Bygningar skulu gerast soleiðis, at nýtslu-, trygdar-, haldgóðsku- og heilsuligu viðurskiftini eru nøktandi. Arbeiðið skal gerast handverksliga rætt. Tilfarið, ið brúkt verður, skal vera gagnligt til endamálið.
Eitt byggiarbeiði er fullgott greitt úr hondum, tá tað, umframt vissu fyri haldgóðari styrki, støðufesti og heilsuligum viðurskiftum, eisini fevnir um verju ímóti skaðadjórum, so sum rottum o.ø.
Ásetingarnar fevna eisini um byggitíðina, har arbeiðið eigur at verða skipað soleiðis, at byggingin er trygg, meðan bygt verður, íroknað, at byggingin ikki rapar og tílíkt.
Samlaða bygningskonstruktiónin skal vera lufttøtt við atliti at orkunýtsluni, sí kap. 7, Orka.
Bygningskonstruktiónir skulu dimensjónerast og gerast soleiðis, at tær kunnu standa ímóti øllum vanligum statiskum og dynamiskum ávirkanum.
Atlit at øðrum viðurskiftum, sum t.d. ljóð- og brunaviðurskifti kunnu eisini vera dimensjónerandi.
Planering skal gerast á tryggan hátt, so skaðar ikki henda orsakað av flytingum í lendinum.
Planering undir kloakk- og veitingarleiðingum, grundstøðinum o.tíl. skal gerast so, at tað er haldgott og frosttrygt.
Í sambandi við frosttrygging av undirstøðinum eiga loysnirnar at vera so mikið góðar og álítandi, at frosttryggingin heldur so leingi, bygningurin stendur.
Serlig atlit skulu takast at brattlendi.
Tekjur og ervaljós skulu gerast soleiðis, at tað ikki er møguligt at detta niður ígjøgnum tekjuna/ervaljósið.
Við ráðlegging, prosjektering, útbjóðing og gerð av bygningskonstruktiónum skulu átøk gerast, sum, við atliti at veðurlagnum, eru neyðug fyri at gera eitt fullgott arbeiði.
Ásetingin er m.a. við til at tryggja, at vátt og vætuviðkvæmt tilfar, og tilfar og bygningslutir við blámusoppi ikki verður innbygt. Tað kann t.d. gerast soleiðis, at byggingin fer fram undir fullkomnari verju fyri regni o.ø. og hóskandi varðveitslu av byggitilfari. Ein hóskandi góðskutryggingarskipan hevur eisini stóran týdning í hesum sambandi.
Virkiskravið kann t.d. verða lokið við:
Bygningskonstruktiónir og byggitilfar mugu ikki innihalda vætu, sum, tá flutt verður inn í bygningin, kann hava við sær vanda fyri vøkstri av blámusoppi.
Kravið er við til at minka um vandan fyri, at flutt verður inn í ov ráligar bygningar og vandan fyri vøkstri av blámusoppi. Hetta er galdandi fyri bæði nýbygging og umbygging. Tá hættisliga vætuinnihaldið í tilfarinum verður greinað, eigur atlit eisini at takast at møguligum yvirflatuskitti. Kravið eigur at síggjast í samanhangi við stk. 5.