Ein partur av vegnum er gjørdur, og talan er sostatt um liðugtgerð av samlaða vegateininum millum Skipanes og Skálabotn. Arbeiðið, sum nú verður farið undir at gera, er ein teinur á umleið 1.500 metrar, har ongin vegøksl er. Breiðkingin fer fram við at fylla upp niðanfyri, har hetta ber til, og í øðrum lagi taka av lendinum omanfyri.  

Herfyri var lisitatión á Landsverki, og inn komu fýra tilboð, har trý liggja sera tøtt. Tað lægsta eigur Articon, ið bjóðar seg at gera arbeiðið fyri  4.483.000 krónur, RTS fyri 4.558.000, J&K Petersen 4.577.000, og síðsta tilboðið er frá JHR, ið vil gera arbeiðið fyri 6.648.000 krónur.

Landsverk skrivaði í síðstu viku undir sáttmála við Articon um at gera arbeiðið. Kostnaðarmetingin er 4.337.000 krónur, og hesin parturin av arbeiðinum skal vera liðugur á sumri næsta ár.

Við í tilboðnum er ikki liðugtasfaltering, eins og gerð av bilverju á einum parti av vegateininum. Hetta arbeiðið verður gjørt, tá peningur er tøkur.