Byggivinnan er avgerandi fyri, hvat fyri samfelag vit ynskja at smíða til næstu ættarlið okkara. Samstundis er byggivinnan ein av høvuðsorsøkunum til, at vit ár um ár spreingja mørkini fyri, hvat heimur okkara orkar at geva. Vit sleppa ikki undan umhvørvisligu og sosialu avleiðingunum. Tó eru tað ofta stuttskygd búskaparlig sjónarmið, sum avgera, hvat og hvussu vit planleggja og byggja.

Um burðardygga skiftið skal eydnast, har atlit verður tikið til búskap, menniskju og umhvørvi, skal arbeiðast bæði strategiskt og pragmatiskt. Við øðrum orðum er neyðugt at seta í verk heildar- og langtíðarætlanir umframt nýggj burðardygg amboð og mannagongdir innan bygging og planlegging. Og hvussu gera vit so tað? Hvat krevur burðardygga skiftið av okkum, sum arbeiða innan økið, og hvørjar karmar tørvar okkum fyri at skapa veruligar broytingar? Hesar spurningar viðgera vit á eini ráðstevnu, ætlað tær, sum hevur áhuga í planlegging, bygging, burðardygd, flytiføri og infrakervi.

Á ráðstevnuni vera framløgur við ymiskum serfrøðingum innan bygging, planlegging og burðadygd, og tiltakið endar við einum pallborðskjaki um hvussu vit koma í gongd við veruliga burðadygga skiftið innan bygging og planlegging í Føroyum.

Ráðstevnan verður á Hotel Føroyum hósdagin tann 7. november 2024 kl. 13.00-16.00. 

Tú finnur skránna og kanst tekna teg her 

Ráðstevnan er skipað av Byggiharrasamtaki Føroya.

Byggiharrasamtak Føroya er eitt áhugafelag, har almennir og privatir byggiharrar, ið hava eina virkna og professionella tilgongd til vinnuna, hava møguleika fyri limaskapi. Í løtuni er hesin limaskapur settur saman av Landsverki, sum hevur formanskapin, SEV, Bústaðir, P/F Eystur- og Sandoyartunlar, og tær fimm kommunurnar: Tórshavnar-, Klaksvíkar-, Eystur-, Runavíkar- og Fuglafjarðar kommunu.