Steno Miðstøðin á Landssjúkrahúsinum útbyggjast fyri at bøta um umstøðurnar fyri bæði sjúklingar, starvsfólk og gransking

11-06-2024

Steno Miðstøðin á Landssjúkrahúsinum útbyggjast fyri at bøta um umstøðurnar fyri bæði sjúklingar, starvsfólk og gransking

Nýggi bygningurin verður bygdur tvørturum á Steno C (C-bygningurin)

Sum liður í visjónini hjá Heilsumálaráðnum, Landssjúkrahúsinum og Novo Nordisk Fonden um, at styrkja innsatsin innan diabetes og endokrinologi annars í Føroyum, verður nýggj Steno Miðstøð fyrireikað, við tveimum hæddum á 1.200 m2 tilsamans. Tær báðar hæddirnar verða bygdar tvørturum C-bygningin á Landssjúkrahúsinum (bygningurin, sum verður kallaður “Steno C” í tekningini omanfyri).

Uppstigan av Steno Miðstøðini hevur týdning fyri nógvar sjúklingar

Við útbyggingini verða karmarnir fyri sjúklingar og starvsfólk, sum hava sína gongd á ambulatorinum, munandi betri, umframt at pláss verður til nýggjar hentleikar fyri kliniska heilsugransking í Sjúkrahúsverkinum.

Uml. 1500 sjúklingar við diabetes ella øðrum endokrinologiskum sjúkum hava tilknýti til Steno Miðstøðina. Í dag starvast tíggju fólk á økinum. So hvørt, sum karmarnir verða betri og møguleiki verður fyri at handfara fleiri uppgávur og víðka um granskingina, fer starvsfólkatalið at økjast. Fólk, sum luttaka í granskingarverkætlanum, fara at halda til í Steno Miðstøðini í styttri og longri tíðarskeið.

Byggingin byrjar í 2025

Landsverk er byggiharri á verkætlanini og hevur júst gjørt ráðgevaraavtalu við Sp/f MAP Arkitektar, sum skulu standa fyri høvuðsráðgevingini.

Rúni Abrahamsen, MAP Arkitektar, og Marjun Weihe Thomassen, Landsverk

Sjálv byggingin byrjar ætlandi í 2025, og bygningurin kann væntandi takast í nýtslu í 2026. Inntil útbyggingin er klár, heldur virksemið fram í Steno Miðstøðini eins og higartil.

Verkætlanin verður fíggjað av Novo Nordisk Fonden.