Havnir, lendingar og brimgarðar

Fyrisitingin av havnunum varð latin Landsverki í seksti-árunum. Síðani 1974 hava smærri og størri ábøtur verið framdar í flest øllum havnaløgum í Føroyum. Summar av teimum vanligu lendingunum eru so líðandi umbygdar til havnir. Í 2010 eru samanlagt fimm landshavnir í Føroyum. Kommunurnar eiga og reka allar hinar havnirnar í landinum.

Fram til fimti-árini vórðu havnirnar bygdar til ferða- og farmaflutnings. Tær nýggjastu havnirnar eru flestar bygdar sum fiskivinnuhavnir, roknað til skip, sum eru 30-40 metrar til longdar og stinga 4-5 metrar.

Í dag eru tað fleiri av hesum havnum, ið eru fult útbygdar til eisini at taka ímóti ferðamanna- og farmaflutningsskipum, sum kunnu vera góðar 100 metrar long og stinga umleið sjey metrar.