Vága Floghavn - Íbinding

Ferðslan til og frá Vága Floghavn er vaksandi. Í 2018 ferðaðust 375.000 ferðafólk um floghavnina. Tað merkir, at dagføringar eiga at gerast, har landsvegurin og aðrir vegir koma saman. Ein av avbjóðingunum við verandi vegamóti er, at sýnið ikki er nóg gott. Harafturat ganga fleiri fólk millum floghavnina og Hotel Vágar. 

Í 2018 var ársmiðalferðslan í Vágatunlinum umleið 2.500 akfør um samdøgrið, og millum Miðvág og Vatnsoyrar var hon 3.059.

Kanningar eru gjørdar viðvíkjandi gerð av rundkoyring, har atgongd til floghavnina og vinnuøkið norðan fyri landsvegin kann bindast saman. Har eru tó leivdir frá krígnum, ið hava virði, og eru friðaðar. Orsakað av hesum, verður mælt til, at vegamótið verður flutt longur eystureftir, har sýnið samstundis er væl betri. Her kann ein vinstrasnaringarbreyt gerast við 300 m av vegi. Ein arbeiðsvegur er longu gjørdur har. Samlaði kostnaðurin fyri verkætlanina er tí minni, enn kostnaðarmetingin her. 

Í sambandi við umbygging av floghavnini, var gongurásin, sum knýtti floghavnina saman við hotellinum, niðurløgd. Tí hendir tað, at fólk eru til gongu á landsvegnum, har einki ljós er.

Tí verður mælt til at gera eina rás og ljósútbúnað millum vegamótini til floghavnina og hotellið. Frá hotellinum er ein rás til Sørvágs.

Eingin avleidd verkætlan.

Eingin samvirkan.

Reyða linjan er íbinding til floghavnina, og bláa linjan vísir gongubreyt og vegljósútbúnað.