NÁTTÚRUUPPLIVINGAR: Í Samferðsluætlanini 2008-2020 peikar Landsverk á nøkur landsvegastrekki við lítlari og ongari ferðslu, ið kunnu nýtast til sonevndar Sóljuleiðir. Her kunnu bæði føroyingar og ferðafólk koyra spakuliga og njóta koyritúrin og náttúruna, uttan at vera til ampa fyri ferðsluna annars.

FESTIVALUR: Fyrireikararnir av tónleikafestivalinum “við Múrin” hava søkt Landsverk um loyvi til at steingja vegin til Kirkjubøar, meðan festivalurin er. Hetta hevur stovnurin givið loyvi til. Møguleiki verður fyri at parkera við Gomlurætt, haðani ókeypis bussar flyta fólk víðari til og úr Kirkjubø.

STARVSSETAN: Herfyri søkti Landsverk eftir leiðara til Byggideildina, og stovnurin hevur nú sett 32 ára gamla Arna Debess Madsen úr Havn í starvið. Nýggi leiðarin, sum er útbúgvin verkfrøðingur, hevur verið í starvi á Landsverki síðani 2012, tá hann varð settur sum verkætlanarleiðari. Seinasta árið hevur hann virkað sum byggileiðari á stóru verkætlanini við Marknagil.

ROYNDARVERKÆTLAN: Í sambandi við sonevndu ESCO-royndarverkætlanina hjá Landsverki, ið snýr seg um orkusparing í almennum bygningum, hava tveir veitarar bjóðað seg fram til at verða undangóðkendir. Talan er um tvær útlendskar fyritøkur, har onnur hevur føroyskar undirveitarar.

SAMSTARV: Vegáleggingarnevndin hjá NVF – Norðurlendskt Vegforum – hevur júst hildið ársfund í Havn. Millum høvuðsevnini vóru bíligari asfalteringshættir, framløgur av granskingarverkætlanum og panelorðaskifti um millum annað menning av nýggjum framleiðsluvørum innan asfaltøkið.

ÁRSFRÁGREIÐING: Almenna húsarhaldið er komið til eitt vegamót, tí skorið er inn á bein nógvastaðni. Kortini mugu blandast av nýggjum, um vit framhaldandi vilja varðveita og menna tær tænastur, sum eitt nú Landsverk veitir. Bæði frá politiskari og umsitingarligari síðu er neyðugt at hugsa effektivisering í breiðari merking og vilja neyðugar broytingar, sigur stjórin á Landsverki í nýggjastu ársfrágreiðingini hjá stovninum.