STARVSSKIFTI: Mikael Viderø, sum seinastu 2½ árini hevur verið leiðari á byggideildini á Landsverki, er frá 1. februar 2015 settur í starv sum tekniskur stjóri hjá Tórshavnar Kommunu. Hetta merkir, at Landsverk í næstum fer at søkja eftir nýggjum leiðara til byggideildina.

AVTALA: Nú kunnu seljarar heita á ein góðkendan byggikønan í sambandi við sølu av fastogn, sum verður nýtt til privatan bústað. Húsaskoðanin er eitt krav, um seljarin ynskir at tekna eina ognarskiftistrygging.

UMVÆLING: Í gjár varð punktum sett fyri umvælingini hjá MT Højgaard av skúladeplinum í Hovi. Hetta varð gjørt við einum kunnandi tiltaki á skúlanum, har bæði umboð fyri Landsverk, Landsstýrið, arbeiðstakaran, undirveitarar, skúlan og onnur áhugaði vóru hjástødd.

AVHENDING: Týsdagin 25. november handaði Landsverk landsstýriskvinnuni í almannamálum, Anniku Olsen, sambýlið til sálarsjúk Eystan Heyg í Havn. Skipað varð í hesum sambandi fyri almennari móttøku í nýggja sambýlinum seinnapartin í gjár, og nógv fólk vóru inni á gólvinum.

FERÐSLUTRYGD: Fríggjadagin varð umleggingin av vegamótinum Millum Fjarða við avkoyringina til Funningsfjørð tikin alment í nýtslu. Umkoyringarbreyt er gjørd, og sostatt er vegamótið vorðið munandi tryggari nú, enn tað var frammanundan. Eisini verða ljós sett upp í næstum.

SIGLINGARLEIÐ: Gamli vitin í Selvindi á Strondum er sløktur, ljósvinklarnir suðureftir á vitanum á Toftum eru sløktir, og nýggjur siglingarviti er settur upp á Strondum uttast í bygdini út móti Raktanga. Broytingin hevur samband við, at møguleikarnir fyri meiri aling í Skálafirði og Tangafirði er økt við nýggjum aliøki fram við Neslandinum.